.

Errezeta

Plater hau oso kitsch dela ere esan daiteke, Iparraldeko ostatu askotan aurkituko baituzu “euskal eraren” seinale bailitzan. Izanak izan, oso plater ederra da, turistez aparte, geuk ere etxeetan jateko.

Oilaskoa zatitu eta gatzpipertu. Barazki guztiak zati nabarietan zatitu, juliana zabar batean, alegia.

Zartagin batean ondo gorritu eta frijitu oilasko zatiak. Ordu laurden inguru hartuko dizu honek. Oso ondo frijitua behar du oilaskoak.

Bitartean, kazola handi batean, tomatea ez besteko barazki guztiak jarriko ditugu oliotan erregosten, su ertainean. Gatz pixkat eman, barazkiak azkarrago egin daitezen eta ura aska dezaten. Bost minutura edo, gehitu tomatea ere eta jirabiratu guztia. Barazkia guritu arte jardungo dugu horrela.

Oilaskoa frijitua delarik, jarri paper gainean oliogabetzeko. Ondoren barazki biguindu artera sartu oilaskoa eta buelta batzuk eman, dena elkarren ondoan goza dadin.

Gehitu ura edo, hobeto salda. Oilaskoaren ertzekin eta piperren txortenekin egin dezakezu, kazo batean irakiten jarrita eta beste barazkiren bat gehituta, porrua, azenariaoa, perrexila… Bestenaz, pastila erdi oilo kontzentratu ere egin dezakezu, urarekin.

Guztia ordu erdi batez edo ukan emeki egosten, oilaskoa guri dagoela ikusi arte.

Utzi apurtxo bat atsedentzen, ondo etortzen zaio jan baino lehen denboratxo batez bakean egotea. Hozten bada, berotuko duzu berriz, zerbitzatu baino lehen.

Arroz zuri bat alboan, primeran etortzen zaio.

Eta fini da, hara hor “poulet a la basquaise” famatua.

[Sukaldean] Oilaskoa euskal eran